Addis Ababa,(insidesomalia.org)-War Saxaafadeed ka soo baxay xafiiska ururka Midowga Afrika ee magaalada Addis Ababa kaasoo lagu cambaareeyay weerar loo adeegsaday miino oo shalay lagu qaaday kolonyo ciidamada AMISOM ay wateen xili ay marayeen agagaarka Garoonka Diyaaraddaha ee magaalada Muqdisho.

Midowga Afrika ayaa sheegay in weerarkaasi lala beegsaday ciidamada AMISOM ee ku geeriyooday askari ka tirsan ciidamada Ugandha uu ahaa mid fuleynimo oo ay ka danbeeyeen kooxo aan u daneyneyn shacabka Soomaaliyeed ee ku jira marxaladda adag, waxaana sidoo kale lagu sheegay in falkaasi uusan waxyeeleyneyn howlaha baaxada leh ee ciidamada AMISOM ay ka wadaan Soomaaliya.

“Weerarkaas waxaa loola dan lahaa in lagu wiiqo howsha nabad ilaalineed ee ciidamada AMISOM ay ka wadaan dalka Soomaaliya, balse howshaasi ay ka wadaan dalka Soomaaliya AMISOM waxba uma dhimi doonto ”ayaa lagu yiri war saxaafadeedka Ururka Midowga Afrika.

Weerarkan loo adeegsaday Miinada ee lala beegsaday ciidamada nabad ilaalinta AMISOM ayaa waxaa durba sheegtay in ay fuliyeen xoogaga Islaamiyiinta Al-Shabaab ee ka dagaalama Koonfurta Dalka Soomaaliya, waxayna sheegeen in ay sii wadi doonaan qaraxyada xoogan ee lala bartilmaameedsanayo ciidamada AMISOM iyo kuwa Itoobiya ee gacanta siinaya Dowladda KMG ah ee Soomaaliya.